Куч - бирликда
Миллий театр директори, Ўзбекистонда хизмат кўрсатган артист Фатҳулла Масудов:
- Ҳурматли ватандошлар, ҳамюртлар! Мамлакатда содир бўлаётган коронавирус балоси еттидан етмиш ёшгача бўлган ҳар бир инсонни ҳушёрликка чорлаяпти. Бу кўринмас вирус балоси ёшни ҳам, кексани ҳам аямаётган бир пайтда ўз эҳтиётимизни ўзимиз қилайлик. “Ўз уйингни ўзинг асра”, деганларидек ўзимизни, оила аъзоларимизни, яқинларимизни дунё бошига ёв бўлиб келган бу касалликдан, офатдан асраб-авайлайлик, вирусга қарши бирга курашайлик. Карантин қоидаларига қатъий риоя қилишимиз, зарурат бўлмаса кўчага чиқмаслигимиз, гигиена воситалари доимо ҳамрохимиз бўлиши, биз фуқаролар томонидан халқимизга бўлган энг катта ёрдамдир. Тўрт ойдан бери давом этаётган синовли кунларда юрт тинчлигини, аҳоли ҳотиржамлигини таъминлаётган давлат хавсизлик хизмати ходимларига, шунингдек, инсонлар соғлиги-саломатлиги йўлида фидокорона меҳнат қилаётган жонкуяр тиббиёт ходимларига ташаккурлар айтамиз.
Азиз ҳамюртлар, келинг, 10-июлдан 1-августга қадар белгиланган қатъий карантин чора-тадбирларига бехато амал қилайлик. Дунёга, халқимизга ёпирилиб келган вирус балосини бирга қувиб солайлик. Фусункор юртимизнинг осуда-осойишталиги учун барчамиз ғамхўр бўлайлик. Кўнгилларга доимо кулгу сиғсин, байрам-тантаналардан ҳамиша қалблар юксалсин!
